Seimineár ar an gCanónach de Paor

Seimineár ar an gCanónach de Paor

Tá sé cothrom is 150 bliain an bhliain seo ó rugadh an Canónach Pádraig de Paor i gCeallachán, Co. Phort Láirge ar an 8 Márta 1862. Scoláire ba ea é i réimse leathan ábhar, ar nós seandálaíocht, stair, oidhreacht, an Ghaeilge agus logainmneacha na hÉireann i gcoitinne, agus Phort Láirge go speisialta. Tá réimse fairsing altanna agus leabhair scríofa aige agus cáil faoi leith air as ucht a chuid saothair "The Placename of the Decies", agus tá pobal na nDéise go mór faoi chomaoin aige dá réir.

Chun a shaol agus a shaothar a cheiliúradh, tá Comhairle Contae Phort Láirge, Comhaire Cathrach Phort Láirge agus Institiúid Teicneolaíochta Phort Láirge tar éis teacht le chéile chun seimineár a eagrú ar a gCanónach de Paor. Beidh an seimineár seo ar siúl in Institiúid Teicneolaíochta Phort Láirge, Cathair Phort Láirge ar an Déardaoin, 8 Márta.

Díreoidh an seimineár seo ar ghnéithe éagsúla de shaol agus de shaothar an Chanónaigh, chomh maith le féachaint ar fhorbairtí nua i réimsí a chuid taighde. Ina measc seo, tá tionscadal nua ar Ainmneacha Páirceanna le Scoil Náisiúnta an Tempaill Gheal agus Scoil Náisiúnta Fhionnúrach, áit a bhfuil na daltaí na scoileanna úd tar éis obair taighde a dhéanamh ar logainmneacha páirce srl ina gceantair féin. Cuirfear torthaí a gcuid oibre os comhair an phobail ar lá an tseimineáir.

Seimineár lae dátheangach a bheidh ann. Beidh aistriúchán comhuaineach (ó Bhéarla go Gaeilge agus ó Ghaeilge go Béarla) ar fáil ar feadh an lae. Tá tuilleadh eolais ar fáil ar chlár an tseimineáir.

Clár an tSeimineár (An gCanónach de Paor Clár an tSeimineár, 597 kbs)